Mbeɛd mi teɣli Bgayet gar yifassen n uspanyul deg useggas n 1510, limir Bubker n Qsenṭina yessawel i yiwet terbaɛt n yibeḥriyen ṭṭfen-ten sin watmaten i umi qqaren les frères Barberousse, akken ad d-ɛerḍen ad d-ḥellen Bgayet. Sin watmaten-ayi semman-asen Ɛerruǧ d Xirdin.
Imir-nni yekker ṭṭrad gar Bubker-ayi-ni akk d Lɛebbas, mmi-s n gma-s yeffren deg Teqliɛt n Yiwannuɣen, i umi qqaren ass-a Lqelɛa n At Ɛebbas.
En mai 1512, deg mayu 1512, zeḍmen Ɛerruǧ d Xirdin ɣef Bgayet, yid-sen 12 n lembwaber ččuren d leslaḥ, 2000 n yituṛkiyen d kra n yimaziɣen yeddan yid-sen. Yeḍfer-iten limir Bubker yid-s 3000 n yiserdasen gar yimaziɣen d waɛraben.
Mbeɛd mi qqimen temniyam nutni kkaten leṣwar n Bgayet s lemdafeɛ, ɛerḍen ad d-ẓedmen akken ad tt-id-kksen seg yifassen n uspanyul, meɛna ur zmiren ara, ladɣa mi yettwet Ɛerruǧ s lmedfeɛ ɣer ufus, yegzem-as akk yiɣil-is.
Ɛamayen mbeɛd, deg useggas n 1514 deg tefsut, uɣalen Ɛerruǧ d Xirdin ɣer tama n Bgayet, ṭṭfen Ǧiǧel tikkelt-ayi. Kecmen 20 000 seg yimaziɣen n tama-nni ddaw leḥkem nsen, gar-asen yiwen lǧid n At Ɣebri qqaren-as Ḥmed U-Lqaḍi.
Ɛerḍen tikkelt niḍen ad d- ẓedmen ɣef Bgayet, meɛna ur s-zmiren ara tikkelt-ayi daɣen.
Ḥmed U-Lqaḍi, lǧid-nni n At Ɣebri yellan ddaw leḥkem n Lɛebbas akk d yiḥefsiyen n Tunes, yeqqel d ameddakel n Ɛerruǧ. Ass mi yexser Ɛerruǧ tikkelt niḍen sdat yispanyuliyen n Bgayet, yewwi-t Ḥmed U-Lqaḍi ɣer uxxam-is, yekcem ddaw leḥkem ines.
Lezzayer
Deg useggas n 1516, ceyyɛen imḍebbren n temdint n Lezzayer ɣer Ɛerruǧ, akken ad ten-iɛiwen bac ad d-sɛesqen ispanyuliyen yellan deg yiwen n lberǧ tama n Lezzayer qqaren-as Le Peñón.
Lberǧ-ayi-ni, i umi qqaren en espagnol El Peñón d’Argel, bnan-t yispanyuliyen deg yiwet n tegzirt iwulan tamdint n Lezzayer.
Iruḥ ihi Ɛerruǧ ɣef uḍar ɣer Lezzayer, yid-s 20 000 seg yiserdasen n Ḥmed U-Lqaḍi. Yejbed iman-is ihi Ḥmed U-Lqaḍi ɣef yiḥefsiyen d Lɛebbas yeqqel ddaw n leḥkem n Ɛerruǧ, sakkin yessekcem yid-s azgen n tmurt n leqbayel ddaw leḥkem-is. Seg yimir-nni, yeqqel Ḥmed U-Lqaḍi d aɛdaw n Lɛebbas, n yiḥefsiyen akk d limir Bubker.
Ma d Ɛerruǧ iruḥen ar Lezzayer akken ad d-ikkes Le Peñón i uspenyul, yenɣa ccix ameqqran n Lezzayer, i umi qqaren Salim Ttumi, u yerra iman-is d sselṭan n temdint n Lezzayer.
Yeqqel Ɛerruǧ d sselṭan n yiwet n tgelda ibeddun seg Cercal almi d Ǧiǧel, tamaneɣt-is, neɣ lɛasima ines, d tamdint n Lezzayer. Ḥmed U-Lqaḍi yeqqel d lexlifa n Ccerq.
Deg useggas-nni, 1516, deg lexrif, ɛerḍen yispanyuliyen ad d-ẓedmen ɣef temdin n Lezzayer, meɛna xesren.
En juin 1517, yunyu 1517, yeṭṭef Ɛerruǧ Tennes.
Deg useggas-nni, 1517, yeṭṭef Ɛerruǧ Tlemsan. Meɛna deg 1518, yeẓdem uspanyul ɣef Tlemsan, u bedden yid-s itlemsaniyen. Yemmut Ɛerruǧ netta yettnaɣ mgal yispanyuliyen tama n Ɣazawat mbeɛd mi yerwel seg Tlemsan. Annect-a yeḍra-d ass n 29 septembre 1518.
Ḥmed U-Lqaḍi yefka afus di tmenɣiwt n Ɛerruǧ akken ad d-yerr ttaṛ n Salim Ttumi, ameqqran n Lezzayer i yenɣa Ɛerruǧ, i yellan d aḍeggal n Ḥemd u-Lqaḍi.
Yuɣal-d U-Lqaḍi ɣer tmurt-is, yejmeɛ s idisan-is leɛrac n At Yeḥya, At Frawsen d Wat Bucɛayeb. Tlata leɛrac-ayi imezwura ara yessekkren tagelda n Kuku.
Tagelda n Kuku semman-as akka ilmend n taddart n Kuku, yellan zik d tamaneɣt, lɛasima, n Ḥmed U-Lqaḍi. Kuku-ayi-ni zik tella d tamdint i iɛelqen nnig udrar, ass-a teqqel d taddart kan tetbeɛ taɣiwant n At Yeḥya.
Xirdin, gma-s n Ɛerruǧ, mi yeẓra zzin fell-as yiɛdawen si mkul tama, ama d Ḥmed U-Lqaḍi, ama d aspanyul neɣ ama d Cercal, Tennes akk d Tlemsan, yessuter leɛnaya n sselṭan n yiɛetmaniyen, Salim Amezwaru. Iceyyeɛ-as ihi sselṭan n yiturkiyen seg Isṭenbul 2000 yiserdasen. Seg yimir-nni teqqel Lezzayer d tamdint taɛetmanit ḥekkmen-tt yituṛkiyen.
Deg useggas n 1520, yekker ṭṭrad gar Xirdin akk d Ḥmed U-lqaḍi.Yexser Xirdin ṭṭrad u yerwel ɣer Ǧiǧel. Ma d Ḥmed u-Lqaḍi yeṭṭef tamdint n Lezzayer seg 1520 ar 1525.
Ma d Lɛebbas, yella yedha imir-nni di ṭṭrad akk d ɛemmi-s Bubker, limir n Qsenṭina.
Taɣbalut
- Benoudjit, Youssef. La Kalaades Béni Abbès au XVIe siècle. Alger, Dahlab, 1997.
- Berbrugger, Adrien. Les époques militaires de la Grande Kabylie. Alger : Bastide, 1857. Consulter en ligne
- Charles-André, Julien. Histoire de l’Afrique du nord : Des origines à 1830. Paris : Payot ; 1994.
- El Mili, Moubarek: Histoire de l’Algérie de l’Antiquité à nos jours. Alger : Entreprise Nationale du livre. Consulter en ligne
- Gaïd, Mouloud. Histoire de Bejaia et sa région depuis l’antiquité jusqu’à 1954. Alger, SNED, 1976.
- Gaïd, Mouloud. Les Béni Yaala. Alger : OPU, 1990.
- Gomara, Francisco Lopez de. Des Indes occidentales à l’Afrique.
- Haedo, Diego de. Histoire des rois d’Alger. Alger, Adolphe Jourdain, 1881. Consulter en ligne
- Kaddache, Mahfoud. L’Algérie durant la période ottomane. Alger : Office des publications universitaires, 1991.
- Marmol y Carvajal, Luis del. L’Afrique de Marmol. Paris : [S.E], 1667. Consulter en ligne