Ur neggar ara tiɣri i yimsebblen di ṭṭrad yekkren gar sin leɛrac, neɣ di ṭṭrad anda d nekkni i iẓedmen ɣef wiyaḍ. Imsebblen ttilin kan anda ilaq ad nesseḥbiber ɣef tmurt mgal ibeṛṛaniyen, neɣ akken ad nessufeɣ abeṛṛani seg tmurt.
D amrabeḍ yettqadaren medden meṛṛa ara d-igren tiɣri i yimsebblen, mbeɛd ma icaweṛ imeqqranen n tmurt. Ad iberreḥ i leɛrac, di leswaq, d akken ilaq ad d-mmten irgazen akken ad nḥareb ɣef tmurt, d akken win yemmuten srid ar lǧennet. Ad d-yernu ad d-yefk melmi d wanda ara ad seǧlen imsebblen.
Ad d-seǧlen sdat tajmaɛt n yimeqqranen n leɛrac ara ittekkin di ṭṭrad. Yal imsebbel ad d-yefk i lxuǧa (amaray) isem-si, isem n lɛerc-is d taddart-is, ad s-yini ma mazal baba-s yedder, ad d-yernu ad d-iqbel tiwetlin (ccuruṭ) n ṭṭrad. Ulac fell-as ma yella kra n yilemẓi yejbed iman-is, ma yella yugi-as baba-s ad d-iqqel d imsebbel, yessuter-it i tejmaɛt n yimeqqranen. D ilmeẓyen ur nezwiǧ i yettaqqalen d imsebblen, maca tikwal ttilin wid izewǧen.
Ma fukken, seǧlen akk imsebblen, ad nefru ahil s yes ara teddun : ad nemsefham yal yiwen acu-t umkan-is, amrig-is (sslaḥ-is), s anda zemren ad d-wexren, ɣer wanida i zemren ad d-ḍefren aɛdaw.
Imsebblen ur ttemxalaḍen ara d yiserdasen niḍen, ttilin dima iman nsen. Ur ntekkes ara lǧetta n yimsebblen yettwanɣan, alama ifuk imenɣi ; win yettwajerḥen ad iqqim deg umkan-is, ala ma dayen ur yezmir ara ad d-innaɣ. D ameqqran n yimsebblen ara d-yinin anwa seg yimejraḥ i izemren ad d-ikemmel amennuɣ d win ur nezmir ara. Annect-ayi akk akken ur ttemxalaḍen ara imsebblen d yiserdasen niḍen. Ayen i d-nenna akk ad d-ittwakteb deg umuɣ anda nura ismawen n yimsebblen.
Ma fukken, amrabeḍ yegran tiɣri i yimsebblen ad d-iẓẓal lǧanaza ɣef yimsebblen, netta d wid iḥeḍren ; imsebblen ur ttẓallan ara yid-sen. Seg yirim-nni, ifuk aḥebbeṛ i yimsebblen. Ad sen-d-awin timegḥal, iceṭṭiḍen, tiṛbuyin n seksu d tẓidanin. Ad d-azlent lxalat d igurdan nsen akken ad d-qedcen i yimsebblen, ttqadaren-ten akken i nettqadar imeɣrasen (ccuhada).
Wid yemmuten seg yimsebblen ad d-ttwameṭlen, di yal taddart, di tmeqbert iman nsen, i umi qqaren « timeqbert n yimsebblen », ara d-yuɣalen d amkan n tirza am tqerrabin. D tajmaɛt ara iseččen tulawin d yigurdan n wid yemmuten, yerna taddart akk ad ten-tqader. Imsebblen ur nemmut ara, ama ttwajerḥen menɛen, neɣ ɣelben iɛdawen, meqqer azal nsen, ifen akk iɛeggalen n taddart, yerna ulac win ara ten-innaɣen. D tajmaɛt ara d-ittkelfen yes-sen ma qqlen d iɛibanen neɣ ma llan d igellilen. Wid ur neṭṭif ara deg wawal nsen, s lqella n tissas, rewlen di tizi n ṭṭiq, ad qqlen ur sɛin azal ur swin taqeffalt, ur ten-ittlaɛi ḥedd, ur nettader ismawen nsen, mmuten ! Ur ttafen tameṭṭut ara iqeblen yes-sen, ma sɛan tiqcicin, ur zewǧent ara.
Gar imedyaten n tɣersawt n yimsebblen, yella ayen yeḍran ass n tnayen 22 deg mayu 1871 di Larebɛa n At Iraten.
Tanṭagt n yimsebblen teḍra-d deg yiḍ n 21 ar 22 n mayu.
Ass n lḥedd 21 n mayu, d tasusmi. Dɣa ɣef 2h n tṣebḥit, slan seg lbeṛǧ n Larebɛa n At Iraten (i umi qqaren imir-nni Fort National) acewwiq n lexwan seg Tablabalt. S akkin, slan i ucewwiq-nni seg Urfya, teḍfer-it tsusmi. Dɣa yekker leɛyaḍ deg yiɣezran, yebda lbaṛud yekkat si yal tama, yezzi-d uḥlalas ɣef lbeṛǧ. 2280 n yimsebblen bedden ddaw leṣwar n lbeṛǧ, srusayen sellumat akken ad d-alin. Dɣa idel lbeṛǧ s uɛmam n tmes d lbaṛud : d wid yellan di lbeṛǧ i yekkaten s lbaṛud d lemdafeɛ di yal tama ɣef kra yellan beṛṛa, wid i ttalin deg sellumat, wid i bedden ddaw leṣwar, wid ireglen, wid i ttasen s tazla ad d-ɛiwnen … Saɛa ur yeḥbis lbaṛud, armi yuli wass, ruḥen imsebblen, ǧǧan ddaw leṣwar n lbeṛǧ 20 sellumat. La nettwali deg ubrid n Lezzayer d izumal n leqbayel ttɛeddayen ɛebban wid yemmuten d wid yettwajerḥen ɣef sellumat.
Imsebblen-ayi, neẓra-ten di Lezzayer deg umennuɣ n Sṭawali (19 yunyu 1930), deg yimennuɣen n Icerriḍen i sin (24 yunyu 1857 akk d 25 yunyu 1871), amennuɣ n Tizi n Tgiǧut (Tizi n Lejba, Tizi Icellaḍen, ass n 26 yunyu 1857). Ɣef wakken i d-qqaren, d Lalla Faḍma n Sumer i d-igran tiɣri i yimsebblen ilmen n umennuɣ n Icerriḍen amezwaru. Deg umennuɣ n At Iraten, mayu 1857, tella tadyant yettbanen am wakken deg-s imsebblen : d tanṭagt n At Iraten ɣef yiwet temɛemmert ṭṭfen-tt irumyen deg wass wis sin n umennuɣ. Di ṭṭrad n Lezzayer (1954-1962), llan ɣɣaren “imsebblen” i wid i yulin s adrar. Tidyanin-ayi akk fukkent di tamda n yidammen : gar 400 d 650 yemmuten deg umennuɣ n Icerriḍen amezwaru, 400 deg wis sin, d wacḥal di tenṭegt n Larebɛa n At Iraten (ur neẓri ara acḥal maca 2280 n yimsebblen yellan din, iban aṭas i yemmuten).
Taɣbalut
- Liorel Jules. Kabylie du Djurdjura. Paris: Ernest Leroux, 1893. Pp. https://www.google.dz/books/edition/Kabylie_du_Jurjura/msThiy2egeAC?hl=fr&gbpv=1&dq=Tamokra+1875&printsec=frontcover
- Robin M. In : Revue africaine. 1874. P. 401.